Thursday, June 21, 2018

మాల్దీవ్స్ - 2

ఆ బంగ్లా లో ఒక రూమ్ నుండి బయటికి బాల్కనీ, అందులోంచి నీళ్ళలోకి మెట్లు ఉన్నాయి. ఇంకా నీళ్లు ఎంత క్లియర్ గా ఉన్నాయంటే, పైనుండి చూస్తుంటే కింద భూమి అడుగు, ఇంకా చాలా చాలా చేపలు తిరుగుతూ కనిపిస్తున్నాయి.గ్లోబల్ వార్మింగ్ వల్ల ఈ ఐలాండ్స్ అన్ని ఒకప్పటికి కనిపించకుండా పోయే ముప్పు ఉందట. అందుకేనేమో కొన్ని చోట్ల వారి పర్యావరణ స్పృహ కనిపిస్తుంది. ఎక్కడ కూడా ప్లాస్టిక్ చెత్తబుట్టలు కానీ కనిపించలేదు. అన్ని మట్టితో చేసినవే ఉన్నాయి. ఆ ఇంట్లోకి వెళ్లేముందు బయట కాళ్ళు కడుక్కోవడానికి కూడా ఒక మట్టికుండ లో నీళ్లు, ఒక కొబ్బరి చిప్పని కర్ర కి కట్టి కుండలో ముంచుకొని పోసుకోవడానికి పెట్టారు :).
లంచ్ టైం అవడంతో ఫ్రెష్ అప్ అయి డైనింగ్ ఏరియా కి వెళ్ళాం. ఇది కూడా ఇసుక లోనే టేబుల్స్, చైర్స్ వేసి పైన గుడిసె లాగా కప్పేశారు. చుట్టూ ఫ్యాన్స్ పెట్టారు. అయినా ఆ వేడి ని తట్టుకోవడం కష్టమే అనిపించింది. భోజనం మాత్రం ఇండియన్, చైనీస్, కాంటినెంటల్ ఒకటేమిటి అన్ని రకాలు ఉన్నాయి, అన్నీ బావున్నాయి కూడా.

సాయంత్రం వరకు బీచ్ పక్కన గడిపేసి, చీకటి పడే సమయానికి sunset cruise బుక్ చేసాం. ఒక 50, 60 మందివరకు ఉన్నారు. సాయంత్రం నుండి సూర్యాస్తమయం అయేవరకు అలా సముద్రం  లోపలికి తీసుకెళ్లారు. చాలా whales నీళ్ల లోంచి పైకి లేచి దూకుతూ పలకరించాయి. ఆలా whale watching  కూడా అయిపోయింది. చీకటి పడుతుండగానే వచ్చి ఫుడ్ కోర్ట్ లో భోజనం చేసి త్వరగా పడుకున్నాం. jetlag వల్ల మర్నాడు ఉదయం  త్వరగా 6 అవకముందే  మెలకువ వచ్చింది. బాల్కనీ లోంచి చూస్తే అప్పటికే సూర్యుడు నీళ్ల లోంచి పైకొస్తూ కనిపించాడు. కాసేపు అక్కడే కూర్చుని సూర్యోదయాన్ని ఆస్వాదించి బయటికి వచ్చాము. వచ్చిన దగ్గర్నుండి డే టైం లో ఎంత వేడి గా ఉందో చూస్తే,అప్పటికే బాగా వెలుతురు వచ్చేసింది కాబట్టి  ఇప్పుడే మంచి టైం ఐలాండ్ అంతా తిరిగి రావడానికి అనిపించింది.
బ్రేక్ఫాస్ట్ చేసేసి కాసేపు రెస్ట్ తీసుకొని ముందే బుక్ చేసుకున్న స్పా కి వెళ్ళాం. దాన్ని మొత్తం నీళ్ల పెయిన్ కట్టి,  స్పా రూమ్ లో మాత్రం కింద గ్లాస్ వేశారు. బోర్లా పడుకొని కింద నీళ్లలో తిరుగుతున్న రకరకాల చేపలు చూస్తూ అసలు టైం ఎలా గడిచిందో తెలియలేదు.

మధ్యాహ్నం snorkeling కి టూర్ కి బుక్ చేసుకున్నాం. అక్కడే snorkel సెట్ రెంట్ కి తీసుకొని వాళ్ళు చెప్పిన చోటికి వెళ్లాం. ఒక చిన్న షిప్ లో మమ్మల్ని సముద్రం పైన కొంత దూరం  తీసుకెళ్లి ఆపారు. ఎవరి కిట్ వాళ్ళు తీసుకొని ఈత కొడుతూ వెళ్లిపోయారు. పాపం ఒకే ఒక అమ్మాయి నీళ్లలోకి వెళ్లకుండా అక్కడే  ఉండి పోయింది స్విమ్మింగ్ రాదని.ఇంకెవరు నేనే. అప్పటికీ మెల్లగా దిగి, షిప్ కి ఉన్న రాడ్స్ పట్టుకొని కొంచెం సేపు అక్కడక్కడే ట్రై చేశాను. ప్రతి ఒక్కరూ రావడం , చాలాబావుంది అంటూ చెప్పడమే. ఎప్పుడూ స్విమ్మింగ్ ఇంట్రెస్ట్ లేని నేను తిరిగి రాగానే క్లాసెస్ జాయిన్ అయ్యాను. ఎప్పటికైనా కొంచెమైనా స్విమ్మింగ్ నేర్చుకొని మళ్ళీ మాల్దీవ్స్ వెళ్ళాలి అని. తర్వాతి రోజు మధ్యాహ్నం హైదరాబాద్ కి ఫ్లైట్. ఆరోజు రిటర్న్ ఫ్లైట్ ఉన్నవాళ్ళందర్నీ షెడ్యూల్ ని బట్టి ఉదయమే షిప్ లో మెయిన్ ల్యాండ్ కి తీసుకొచ్చి దింపారు. అక్కడినుండి కొచ్చిన్ లో ఫ్లైట్ మారి రాత్రి కల్లా హైదరాబాద్ చేరుకున్నాం.

Tuesday, June 13, 2017

మాల్దీవ్స్ - 1

Heaven on earth - నిజంగా ఈ మాట సరిపోతుంది ఆ ప్లేస్ కి అనిపించింది మాల్దీవ్స్ లో ఉన్నప్పుడు. ఆ ప్లేస్ లో ఉన్న జ్ఞాపకాల వల్ల కాకుండా, చూడగానే ఒక ప్లేస్ తో ప్రేమలో పడటం అంటే ఏంటో తెలిసింది.
మొన్న ఏప్రిల్‌లో ఇండియా వెళదాం అని ప్లన్ చేసినప్పుడు,ఒక 2,3 రోజులు ఎక్కడికైనా వెళ్దాం అనుకున్నాం. కొన్ని ఆప్షన్స్ చూసుకున్నాక మా ఇద్దరి ఓటు మాల్దీవ్స్ కే వేసాం. న్యూయార్క్ నుండి డైరెక్ట్ హైదరాబాద్ ఫ్లైట్ కాకుండా, న్యూయార్క్ టు మాల్దీవ్స్ , అక్కడ నుండి హైదరాబాద్ కి బుక్ చేసాం.
దిగేసరికి ఉదయం 9 అవుతుంది, అప్పటికే అక్కడ ఎంత వేడిగా ఉందంటే AC నుంది బయటికి వచ్చాక ఒక్క నిమిషం కూడా ఫ్యాన్ కింద ఉండలేకపోయాం.ఆ ఎయిర్‌పోర్ట్ కొంచెం పాత పాతగా, చాలా చిన్నగా ఒక బస్టాండ్ అంత ఉంది. మాల్దీవ్స్  కి వెళ్ళడానికి ప్రపంచంలో ఏ దేశం వాళ్లకైనా వీసా అవసరం లేదు, పాస్‌పోర్ట్ ఉంటే చాలు. అక్కడ ఇమిగ్రేషన్‌లో on arrival వీసా ఇస్తారు visitorsకి. బయటి దేశాల నుండి ఆల్కహాల్ అనుమతించరు. ఒకవేళ visitors ఎవరన్నా తెలియక తమతో తీసుకొస్తే, పాస్‌పోర్ట్ చూపించి అక్కడ కస్టంస్ ఆఫీస్‌లో వదిలి, తిరిగి వెళ్ళే అప్పుడు తీసుకొని వెళ్ళొచ్చు. మాల్దీవ్స్ కొన్ని వందల చిన్న చిన్న ఐలాండ్స్ సముదాయం. కాని అందులో కొన్ని మాత్రమే మనుషులు ఉందటానికి వీలైనవి. ఎయిర్‌పోర్ట్ కూడా ఒక చిన్న దీవి పైనే ఉంది, అందుకే విమానం దిగే అప్పుడు నీళ్లలొనే దిగుతున్నామా అనిపించే అంత దగ్గరగా ఉంది రన్‌వే.
Airport

ఒక్కొక్క ఐలాండ్ మొత్తం ఒక రిసార్ట్. మేము బుక్ చేసిన రిసార్ట్ వాళ్ళు ఎయిర్‌పోర్ట్ బయటికి వచ్చి ఒక కౌంటర్ నంబర్ దగ్గరికి వెళ్లమన్నారు. బయటికి రాగానే వరుసగా ఒక 40,50 చిన్న చిన్న కౌంటర్స్ ఉన్నాయి. ఒక్కొక్క దానిపైన అది ఏ రిసార్ట్‌కి సంభందించినదో రాసి ఉంది. మేము మాకు చెప్పిన కౌంటర్ దగ్గరికి వెళ్లి మా వివరాలు ఇస్తే, అతను వెరిఫై చేసుకొని, ఇంకా వచ్చేవాళ్లు ఉన్నారు అని చెప్పి వెయిట్ చెయ్యమన్నాడు.అలా కాసేపు వెయిట్ చేసాక, అందరు వచ్చేసారని మమ్మల్నందర్ని బోట్ దగ్గరికి తీసుకెళ్ళాడు.ఎయిర్‌పోర్ట్ నుండి బయటికొచ్చి రోడ్ దాటగానే సముద్రం. అది కూడా చాలా క్లియర్ బ్లూ వాటర్. మొత్తం ఒక 20 మంది వరకు ఉన్నాము.  
అక్కడి నుండి ఆ బోట్‌లో 45 నిమిషాలు ప్రయాణం చేసి మా రిసార్ట్ ఐలాండ్‌కి చేరుకున్నాం.ఆ దారంతా చుట్టూ ఎటు చూసినా బ్లూ వాటర్, మధ్యలో చిన్న చిన్న ఐలాండ్స్..అద్భుతం తప్ప ఇంకో మాట లేదు వర్ణించడానికి.
అక్కడ ఒడ్డున దిగి లోపలికి నడుస్తుండగానే, పనిచేసే స్టాఫ్ అంతా డ్రంస్, చిన్న music instruments వాయిస్తూ, సంగీతం తో స్వాగతం చెప్పారు.రెసెప్షన్ హాల్లో రెస్టారెంట్‌లాగా చాలా కుర్చీలు వేసి ఉన్నాయి. వచ్చిన వాళ్లందర్నీ అక్కడ కూర్చోమని, ఆ వేడిలో చల్ల చల్లగా జ్యూస్ ఇచ్చారు. హాల్లో కింద ఫ్లోరింగ్ లేదు, ఇసుక పైన అలాగే చుట్టూ గోడలు కట్టేసారు. చెప్పులు తీసేసి హాయిగా ఆ మెత్తటి ఇసుక పైన కాళ్లు పెట్టి, చల్లటి డ్రింక్ తాగుతుంటే దాదాపు 24 గంటలు ప్రయాణం చేసిన అలసట పోయినట్టనిపించింది.
ఈలోపు వాళ్లొచ్చి రూం కీస్, ఐలాండ్ మ్యాప్ అక్కడ ఉన్న వసతుల గురించి చెప్పారు. తర్వాత చిన్న మోటార్ వెహికిల్‌లో ఎవరి రూం దగ్గర వాళ్లని దింపేసారు. ఆ ఐలాండ్ ఎంత చిన్నదంటే చుట్టూ నడుస్తూ తిరిగిరావడానికి గంట కన్నా ఎక్కువ పట్టదు. అందులోనే ఫుడ్ కోర్ట్‌లు, రెస్టారెంట్స్ అక్కడక్కడ చిన్న బార్స్, స్పా అన్ని ఉన్నాయి.
మమ్మల్ని బీచ్ ఒడ్డున దింపి, నీళ్లలోకి కట్టిన చెక్క వంతెన వైపు చూపించాడు, అటువైపు మా రూం అని.

ఇందులోనే మేము తీసుకున్న overwater bungalow. ఇంత అందమైన ప్రదేశం గురించి రాయాలంటే నాకు ఇంకో పోస్ట్ కావల్సిందే  మరి..